ከተማ አስተዳደሩ የታዳጊ ከተማ አስተዳደርነት እውቅና አግኝቶ ከ04/03/2011 ዓ/ም ጀምሮ ባልተሟላ የሰው ሃይልና የበጀት አቅም ወደ ስራ የገባ ቢሆንም በርከት ያሉ የልማት እንዲሁም የመልካም አስተዳደር ስራዎች ሲያከናውን ቆይቷል፡፡ በ2012 ዓ/ም የተጓደለ የመንግስት አደረጃጀት በማሟላት የከተማ ፍትህ ጽ/ቤትና ፍርድ ቤት ወደ ስራ እንዲገቡ በማድረግ ከተማ አስተዳደሩ ሙሉ የመንግስት አገልግሎት መስጠት ጀመረ፡፡ በሂደትም እንደ አዲስ መዋቅር የሚጎሉ ነገሮችን ወጧቱን፣ ባለሀብቱንና ነጋዴውን እንዲሁም መላው ማህበረሰብን በማስተባበር ቢሮ ከመገንባት ጀምሮ ያሉ ጉድለቶችን ለማሟላት ጥረት ተደርጓል፡፡ በሂደትም የገቢ አቅሙን ከአመት አመት በማሳደግና በየተቋማቱ አገልግሎት የሚሰጡና የከተማዋን እድገት ማፋጠን በሚችል አግባብ የሰው ሃይል ማሟላት ተችሏል፡፡ ይህን ተከትሎ ከተማ አስተዳደራችን በርካታ የተሞክሮ ምንጭ የሚሆኑ ተግባራት መፈፀም በመቻሉ ከተለያዩ  የክልሉ አካባቢዎች በመምጣት ከተሞች ልምድ ወስደዋል፡፡

ባጠረ ጊዜ በውስን የሰው ሃይልና በጀት በከተማችን ይህ ውጤት መመዝገቡ የብልፅግና ጉዟችን እውን እየሆነ መምጣቱን ያሳያል፡፡ ቀጣይነት ያለው ብልፅግና ለማረጋገጥ ከተማችን ለነዋሪዎቿ ሳቢና ማራኪ ለማድረግ፣ ሰላሟና ደህንነቷ ለማረጋገጥ ፣ማህበራዊ ፍትህ የሰፈነባት ለማድረግ የከተማችን ማህበረሰብና የመንግስት ቅንጅት ካሳለፍነው የስራ ጊዜ የበለጠ አጠናክሮ ማስቀጠል ያስፈልጋል፡፡ ሁሉአቀፍ ብልፅግናን ለማረጋገጥ በከተማችን የህዝብ ተሳትፎን ማረጋገጥ፣ ከተማዋን የአገልግሎት ማእከል ማድረግ፣ የሀገርና የውጭ ቀጥተኛ ኢንቨስትመንት አሁን ካለበት ይበልጥ ማስፋፋትና ወጣቱ በዚህ ዘርፍ ስራ እንዲፈጠርለት በሚያስችል አግባብ ለመምራት ጥረት እየተደረገ ይገኛል፡፡ ከዚህ በተጨማሪ በከተማው ከጊዜ ወደጊዜ እየጨመረ የመጣውን ስራ አጥ ወደስራ ለማስገባት መጠነ ሰፊ ስራ እየተሰራ የሚገኝ ሲሆን በዋናነት ለብድር የሚሆን ሀብት በተለያዩ ጊዜያት የተሰራጩ ብድሮችን በማስመለስ ዳግም ለብድር በማመቻቸት፣ ከመንግስት ካዝና በመቀንስ ጭምር መመደብ የተቻለበት ሁኔታ ሲታይ ለጉዳዩ የተሰጠውን ትኩረት የሚያሳይ ነው፡፡ ሌሎች ሼድ ፣መሸጫና ማምረቻ ቦታ እንደዚሁም የገበያ ትስስር በመፍጠርም ለመደገፍ ጠረት እየተደረገ ነው፡፡ ከዚህ ውጪ ወጣቱ በፖለቲካው እንዲሳተፍና የመወሰን እድሉም እንዲጨምር እየተሰራ ይገኛል፡፡

ልዩ ልዩ ልማቶችን በተመለከተ የከተማው ማህበረሰብ ላለፉት ስድስት ዓመታት ሲጠይቀው የነበረው የከተማው ውሃ ፕሮጀክት ወደ አገልግሎት ያስገባን ሲሆን በስርጭት ሂደት እያጋጠሙ ያሉ ችግሮችም እየፈታን እንገኛለን በዚህ አጋጣሚ ህዝባችን ላሳየው ትእግስት ያለንን ላቅ ያለ ምስጋና ማቅረብ እፈልጋለሁ!! ሌላኛው በከተማ የገንዘብ አቅም የሚገነባው ጤና ጣቢያ ሲሆን አሁን ላይ አብዛኛው ስራ የተጠናቀቀ ሲሆን በአመቱ መጨረሻ ወደ ስራ ይገባል ተብሎ ይገመታል፡፡ ከዚህ ውጪ በፌዴራል ትምህርት ሚኒስቴር እየተገነባ የሚገኘው አዳሪ ትምህርት ቤት ሲሆን ለዚህ የሚሆን ቦታ አርሶ አደሩን በውይይት ከማሳመን አንስቶ ለቦታው የሚያስፈልግ ከ9 ሚሊየን ብር በላይ ለካሳ በማመቻቸት ፕሮጀክቱ እውን እንዲሆን አድርጓል፡፡ ቀሪ የመሰረተ ልማት ስራዎች ከማፋጠን አኳያም የውስጥ ለውስጥ የጠጠር መንገድ ግንባታ፣ የዲች ግንባታና ኮብል ስራዎች በማፋጠን ላይ የምንገኝ ሲሆን እነዚህንና መሰል ማህበረሰቡን የሚያስጠቅሙ ስራዎች የፓርቲያችን እሳቤ ምንጮች ሲሆኑ ይበልጥ እየተጠናከሩ የሚቀጥሉ ይሆናሉ።

በመጨረሻም አሁን የገጠመንን የጸጥታ ችግር በጋራ በመከላከልና አላስፈላጊ እንቅስቃሴዎች በመቆጣጠር አጠቃላይ በፖለቲካው፣ በማህበራዊና በኢኮኖሚ ጉዳዮች ማህበረሰቡን ተጠቃሚ ለማድረግና የከተማውን እድገት ለማፋጠን በምናደርገው ርብርብ አባላችን፣ ወጣቱ፣ ደጋፊዎቻችንና መላው ማህበረሰብ ከጎናችን ሆኖ እንዲያግዘን እጠይቃለሁ አመሰግናለሁ!!